關詠荷叫囡囡溫習被駁嘴：你都冇讀書

藝人關詠荷（Esther）以大使身分出席活動，分享之前她去尼泊爾災區作慈善探訪的經歷，她謂今次可以分開四個主題，分別是「開心」、「有驚無險」、「意想不到」及「傷心」。

上山陷險境

講到「有驚無險」時，Esther表示當地有好多山路，他們經常要搭好耐車才能到山上探訪，有一日天色突然轉壞，落山後即刻橫風橫雨：「好似電影《龍捲風》啲場面咁，Feel到架車好難行，見到前面有車翻側，之後仲落咗30秒冰雹，架車開始漏水，我哋要喺裏面着雨褸，好彩最後好驚險咁走咗。」

遇白內障小妹妹

而講到後面兩個主題時，Esther眼紅紅表示當地有個小妹妹有白內障，醫好一隻眼之後，她說：「佢媽媽話有一隻眼睇到就得，所以唔醫埋另外嗰隻眼，呢啲真係意料之外，因為我作為媽媽，都希望小朋友可以平安健康，我返到嚟都有同個女講，佢都話點解會咁，仲話覺得我哋好幸運，因為佢以為一出世個個都係完整，但我都有同佢解釋番因為當地人生活太艱苦，所以嗰個媽媽先咁做。」

下次想同女兒去探訪

受訪時Esther表示這次是她第二年出外地探訪，而去尼泊爾則是第一次，而她這次旅程去了六日，亦令她眼界大開，如發現原來當地人很友善、會打扮，當地食物亦幾合口味：「個咖哩羊我哋差唔多日日食。」她亦表示當時是地震一周年，看到很多樓房倒塌，缺少一面牆。講到剛才她分享經歷時眼紅紅想喊，她表示：「因為真係諗唔到個媽媽會咁做，最簡單我哋就係希望小朋友健康係最緊要，機會去到面前都唔去醫，所以覺得肉緊。（去到有冇喊？）我Ok嘅。」講到她有跟女兒分享經歷，問現年十歲的女兒可會想一起去？她謂：「佢今次都想去，但啲期唔啱，所以可能下次一齊去。」

嘆讀書辛苦

另外，講到無綫節目《沒有起跑線？》引起不少家長批判言論，對此Esther表示無看此節目：「以前聽人講小朋友出世就要預備佢將來做乜嘢，依家再將件事放前啲，但無可厚非，如果你信呢套，我佗B都有畀個女聽莫札特，雖然唔知有冇用，但佢依家都鍾意唱歌，有冇用要自己對號入座，但明白做父母係想小朋友好優質，但去到小朋友出世後，我覺得最緊要係小朋友開唔開心同願唔願意去學嗰樣嘢。」她亦謂自己都不喜歡讀書，有時叫女兒用心讀書，慘被女兒反駁她「你都冇讀書啦」，她笑言：「搞到我好嬲，不過都會同佢解釋番，但如果畀我再揀，讀書真係好辛苦。」問她可是怪獸家長？她透露：「都有幫佢報興趣班，但上咗一段時間，佢覺得冇興趣就冇再上。」有指她找七個碩士生幫女兒補習，她稱沒有那麼多：「中、英、數基本有，因為佢讀國際學校，中文程度低啲，有時都會陪佢一齊讀書，做得好就畀獎勵。」

憶拍劇辛酸

此外，問可有意復出拍劇？Esther即笑言：「唔搵我哋呢啲啦。（就係搵你哋呢啲。）唔想啦，好習慣依家呢種生活，有日喺街撞到TVB Crew拍劇，見到黃智雯同袁偉豪着得好靚咁拍劇，但好熱，諗番起以前拍劇好辛苦，原來以前都經歷過呢啲，又冇得瞓覺，依家我冇咁嘅魄力，行條樓梯都氣喘，仲0626真係頂唔順，同埋開始退化，背唔到咁多對白。」