拍完《忘》冇聯絡！原島大地恨同青雲合作

「18歲人氣小鮮肉」原島大地從日本到港出席天梭表活動，他表示自己受NBA影響，故很喜歡籃球運動，還即席表演射籃球，於30秒內射入14球，其後自嘲表現普通。

日本低調專注讀書

原島大地表示因未開始放暑假，是次請了星期一的假期來港出席活動。問到暑假會否來港工作搵真銀？他說：「好難講，接到工作會返，暑假諗住喺日本考車牌。（係咪揀大學啦？）未定，依家係高中最後一年，揀咩科都未定。（會唔會暫時放棄學業做幕前工作？）以學業為重，唔會放棄學業。」原島大地又謂暑假暫時未有接工作，但就正在洽談一部電影，談及想嘗試甚麼角色，他說：「每一種角色都想拍同挑戰，可以學新嘢。（喺日本讀書有冇參加戲劇組？）喺日本冇，我喺日本專注學習，好似普通人咁生活。（同學知唔知你係明星？）有啲知，有啲唔知，大部分都唔知，少部分知嘅有問我攞簽名。」

「金像獎」巧遇青雲

身為童星的原島大地，透露自己亦有睇番以往跟劉青雲一起拍攝的電影《忘不了》。問到現在會想跟哪位藝人合作？他說：「冇話特別邊位，個個都想合作，最好係青雲哥哥，拍完戲都冇聯絡，但有喺『金像獎』撞到。」

鍾意女仔多言

談到現時感情狀況，原島大地表示沒有拍拖，以前讀書時期算有。講到覺得哪一類型女孩較吸引，原島大地謂：「唔使太特別，普通，適合就得，相比靜，我鍾意人多講嘢，可以傾到偈。（你個人浪唔浪漫？）麻麻。（最浪漫做過咩？送花？）真係連花都冇送過，係有間唔時拎包。」又稱因準備考大學，故已退出學校球隊，又指自己在校打波時沒有女粉絲。