鄧達智開餐廳　朝早做茶記夜晚做私房菜

時裝設計師鄧達智（William）早於10年前已構思開餐廳，但基於各種原因而擱置，適逢機緣巧合，在其元朗老家附近有舖位，業主問他有沒有興趣開餐廳，於是他重拾10年前的夢，在今年4月底夢想成真，開設了Cafe 123。餐廳日間是茶餐廳，主打有他親自炮製的黑松露牛角包、叉燒炒蛋法包、西班牙奄列撈麵，以及各式蒸飯等平民小吃，他說：「我哋餐牌唔算多嘢，我想做得精啲，如果做得精，幾樣就夠。」食物價錢大眾化， William希望做一位「對得住顧客」的老闆。

每星期做兩晚私房菜

下午5時後，茶餐廳會搖身一變，成為只接受預訂的私房菜館，為免太辛苦及保持質素，William表示每星期只會做兩晚私房菜，不一定是做有錢人生意，而是想煮出平實的家鄉菜。問到有甚麼菜式？他說：「我煮乜客人就食乜，當然可以傾吓，但大部分菜式我都會提議，包括傳統圍村節慶菜、意大利菜，仲有我屋企印尼姐姐嘅咖喱，所以乜嘢國家菜都有。（廚師係咪外聘？）主要廚師係我家姐，因為佢已經掌握到媽咪嘅家鄉烹調法，我會幫手做醃製過程。」

人生下半場啟航

William在時裝界享負盛名，問到是否銳意在飲食界也闖出一番名堂？他笑着否認：「其實我開餐廳，係開始半退休生活嘅第一步，所以有人問我會唔會開第二間？我就冇諗，做呢間餐廳背後原因係想提醒自己，唔好再好似以前咁忙， 以前忙到好少時間喺香港，依家會擺多啲時間喺度，順便都係一個朋友嘅聚腳地！」William的人生下半場正式啟航！