周永恒澄清冇被發禁制令　有權見女兒

歌手周永恒（Roy）自因出軌而與趙頌茹（阿Yu）婚變後，兩個囡囡由阿Yu照顧，Roy坦言事件發生近兩年都有自我檢討，更以運動轉移視線，並在內地開設健身室，他表示：「檢討咗好多、好長時間，依家會用時間去行動，做多啲運動，咁可以諗少啲嘢，初頭個一年會諗好多，會覺得內疚。」

談及早前到囡囡的幼稚園等放學，因嚇親囡囡險要報警處理，問到要閃閃縮縮是否因為有禁制令？他直言：「唔係，依家係到澄清番係冇禁制令，一開始個女係我湊，而個女都係我親手送去屯門，嗰日係中秋節，我主動Call佢問佢（趙頌茹）有冇奶粉尿片，本身話畀佢湊兩日，但畀咗兩個女佢之後就再搵唔到佢，由嗰日開始就冇見過。」問到會否怪阿Yu「霸住」兩個女兒？他坦言不能怪對方，始終問題因自己而起，他又稱有試過致電阿Yu，不過可能因為她沒有自己的新電話，所以沒有接聽，問到會否爭撫養權？他說：「依家都唔使話爭咩撫養權，總之爸爸係爸爸，媽媽係媽媽，最想兩個女都幸福健康，我最怕兩個女覺得我哋唔要佢哋。」