林保怡玩暗寸　廖碧兒耍大牌犯眾憎？

藝人林保怡與廖碧兒拍攝的《瑪嘉烈與大衛系列-綠豆》傳出不和，保怡自爆有演員拍攝時NG二、三十次累街坊，有傳碧兒拍劇時耍大牌，令女一周家怡戲份傳被刪減，種種是非矛頭疑似直指碧兒。

廖碧兒耍大牌變女主角？

藝人林保怡、周家怡、廖碧兒、湯怡、王宗堯、趙學而及游學修主演ViuTV播放的《瑪嘉烈與大衛系列-綠豆》獲好口碑，惹來不少網民評論，據知，廖碧兒首日開工即耍大牌，由於劇集改編南方舞廳小說《瑪嘉烈與大衛系列的綠豆》，她誓要原作者在場才肯開工，更不停出招「氹掂」對方改劇本，由原本配角變女主角，令原本女主角的周家怡遭刪戲份，廖碧兒亦因多次讀錯對白NG收場，種種惡行成為全劇演員及工作人員犯眾憎。

游學修Upload食飯片爆大鑊？

游學修日前在Facebook上載一條近15分鐘的食飯片，出席人有保怡、周家怡、湯怡及一眾工作人員，未見碧兒蹤影，片中的游學修代網民問問題，當讀出有網民大讚廖碧兒在劇中好好戲及有女人味時，周家怡及湯怡等人齊齊報以掌聲，此時，保怡指住拍掌者說：「你睇你哋幾假，講啲真嘢得唔得呀。」暗串對方「戲屎」，亦有網民問拍一輯要幾耐，保怡明抵死說：「咁就睇演員，有啲場口一Take，有啲二、三十Take。（邊個？）唔講啦。」身旁的監製插咀說：「一Take嘅人喺晒到。」游學修又問邊播邊拍最大挑戰是什麼？保怡有骨落地說：「個啲Take好多Take嗰啲囉，嘥時間。」有人笑他「爆料」，保怡正經說：「我講事實。」矛頭疑似衝着廖碧兒去，最後更大方表示今次拍攝酬勞高過無綫。

疑似搏宣傳

保怡今日透過電話回應「暗寸」廖碧兒一事，他多度幫對方講好說話：「碧兒記中文對白係辛苦，如果對白係英文就一流，對佢係有難度，導演係鏡頭上幫咗碧兒好多。（話全劇演員唔鍾意佢？）唔係，碧兒好好人，成日帶紅酒請我哋飲。」對於在片中指有人要二、三十Take，保怡說：「誇張咗，最多三、四Take。」隨即抵死反問記者說：「你哋睇完段片真係覺得我哋話嗰個係廖碧兒？咁我哋達到目的喇。」似為劇集宣傳技巧，至於人工多過無綫，保怡直言冇惡意：「接戲唔係睇錢，無綫有好戲都會接。」而游學修被問到片中將廖碧兒擺上枱，他說：「睇到咩就咩，我補充唔到。」

最強娛樂APP《東網巨星》，不時推出最新最好玩娛樂節目，除了早前推出的特備節目《發哥有Say》、《黎明話你知》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！

最強娛樂APP「東網巨星」下載連結：

http://on.cc/redirect/entertainment