洪卓立搵張敬軒做軍師講感情事

洪卓立（Ken）推出新曲+精選《零點一世紀》，講到新歌《痛》是與張敬軒合作，他笑言在制作過程中有三分二時間是「吹水」，軒仔聽完他的心事後更會開導他，有時講到同女友湯怡（Kathy）的關係，軒仔更會教他情侶間的相處之道：「我同Kathy都係躁底之人，會有火星撞地球嘅時候，講兩句畀佢聽，佢會話如果係佢會點處理事情、會點氹，的而且確我又覺得依樣嘢係需要做嘅，雖然同佢都咁多年好多嘢都知，但做係另一件事。」

談到同Kathy拍拖多年可會有覺得有感情轉淡的時候？他直言：「唔多唔少都會，頭幾年一定好甜蜜，但慢慢開始，我同佢一齊住，啲缺點就開始喺生活上逐一見到，但我又覺得係好正常，唔一定係兩個相處好融洽先喺埋一齊，一定係有啲嘢大家唔鍾意，咁樣先叫生活。」