好邪！連詩雅再度搞錯Piece同Peace

歌手連詩雅（Shiga）由細到大都讀國際學校，理應英文水平有番咁上下，不過佢成日畀網友捉到用字同文法出錯，英語能力大受質疑！尋日，Shiga又整咗個語言陷阱畀自己踩，而最邪嘅係，今次佢又係分唔清Piece同Peace，有冇咁橋呀！

自抽定巧合？

之前因為將「Rest in Peace」寫錯做「Rest in Piece」而畀人強烈恥笑，仲要多咗個花朵叫「連Piece雅」嘅佢，今次繼續跌入「Piece」嘅漩渦，不過今次佢唔係寫錯Peace做Piece，而係調番轉寫錯Piece做Peace，佢將著名漫畫「One Piece」寫錯咗做「One Peace」，到底係呢兩個英文字同佢前世有仇、真係「咁啱得咁橋，飛機撞紙鳶」、定還是佢有心寫錯，自抽一番呢？真係得佢自己先知喇。

對於連詩雅再次「這陷阱、這陷阱、這陷阱，偏我遇上」，網友當然係又再強烈恥笑啦，仲笑言叫佢罰抄一千次。點知Shiga真係「找數」，仲喺網上直播罰抄嘅過程，證明自己親手罰抄一千個「Piece」字。其後，Shiga更上載完成罰抄嘅成果，見到七張紙都寫滿密密麻麻嘅「Piece」，就知佢好認真！不過小編就有個建議，其實連詩雅根本識得串Piece，只係佢分唔清Piece同Peace嘅分別，所以如果想罰抄得到應有嘅功效，應該係分別罰抄一千次「Rest in Peace」同一千次「One Piece」先係，否則下次可能又有錯嘅機會...touch Wood！