Adam Levine自己動手剷Mohawk頭　衰咗！

人氣樂隊Maroon 5主音Adam Levine持住自己有型好睇，不時都鐘意換髮型，試過金毛同光頭，今次Adam就轉玩Punk味十足嘅Mohawk頭。不過，Adam今次唔係交比髮型師負責剪，反而好即興咁喺屋企自己DIY，仲喺Instagram上載花絮照。相入面嘅Adam似乎已經剪得七七八八，望落真係......好似衰咗咁，耳邊頭髮剃到「一忽忽」，留低嘅「雞冠」頭髮唔長唔短，成件事好似好唔夾，真係一睇就知係DIY失敗之作，難得在旁負責拎相機影相嘅大肚VS索模Behati Prinsloo咁都唔出口叫停老公，就咁無得番轉頭，連Adam自己都爆粗留言話：「當你剪你自己啲XX時，就會發生咁嘅事。」

不少粉絲見到都留言：「你搞咩呀！！！」亦有粉絲話係舊相，希望真係舊相啦。