《進擊》F Cup女星水崎綾女嫁圈外男

日本藝能界嘅結婚喜事一單接一單，今日更加一口氣有多位藝人爆出婚訊！其中曾經為真人版電影《進擊的巨人》扮演單親媽咪角色希雅娜嘅27歲女星水崎綾女，宣布昨日已跟一名任職節省能源產品販賣、現年36歲嘅圈外男性註冊，擁有F Cup身材嘅佢，近年以性感打女姿態活躍影視界，最新作品便有《變態超人2》。

水崎綾女透露與丈夫是去年5月打麻雀而認識，認為睇牌品便知性格嘅佢，在麻雀枱上深深被男方所吸引，加上大家同樣出生於兵庫縣特別投契，所以好快便以結婚為大前題展開交往。據知兩夫婦未定婚禮等事宜，但已結伴同居，而水崎綾女強調並非奉子成婚。

另外，曾為《進擊的巨人》動畫聲演里維兵長嘅41歲超人氣聲優神谷浩史，被雜誌《Flash》踢爆秘密迎娶漫畫家中村光，之間並已育有一名就讀幼稚園嘅女兒。至於男星平幹二郎嘅41歲演員囝囝平岳大則宣布與一名從事出版界的女性結婚。