《玄學星相》：伍詠薇練海棠小別勝新婚

結婚多年嘅伍詠薇同老公練海棠，一向係圈中嘅模範夫妻。不過，日前驚傳練海棠偷食索女，令佢哋17年嘅婚姻出現暗湧。而高EQ嘅伍姑娘表現大方得體，好快原諒咗老公，仲一齊去三亞旅行添！《東網巨星》推出的節目《玄學星相》，最新一集邀得堪輿學家麥玲玲，以玄學角度全面分析事件會唔會影響到佢哋兩公婆嘅關係。

練海棠近日被踢爆密會索女，究竟呢件事會唔會影響到佢同伍姑娘嘅婚姻？佢哋又會唔會再出現暗湧？對此，麥玲玲分析指：「今年係一個相沖嘅運，出年就係本命年，所以危機係有，但睇番伍詠薇嘅命格唔係有分離運，只係佢哋夫妻之間會有啲小爭執同衝撞。（咁佢哋仲會唔會再出現暗湧？）其實佢哋每隔幾年都容易有小沖擊，去到2020年又再『沖日腳』，所以我建議佢哋有時聚少離多，小別勝新婚反而會更好。」

而發生呢件事後，伍姑娘好快原諒咗老公兼孖住佢去度假，唔少網友都大讚佢係絕頂好老婆！唔知平日大癲大肺嘅伍姑娘私底下份人係咪都咁硬淨？麥玲玲指：「其實佢係女生男命，兼且有『七殺星』，以前古代嚟計，佢係一個將軍，有領導才能，所以佢遇到事都反應鎮靜，同埋佢係先解決件事，之後先再慢慢諗，所以唔會有一哭、二鬧、三上吊。」想繼續聽師傳點講？只要Click入《東網巨星》嘅「視娛樂」，睇《玄學星相》就更啱Feel！