旅遊女神唔吼艷遇　周雅霏獨愛香蕉仔

貌似孫燕姿的旅遊節目主持周雅霏（Faye）最近推出第二本遊記，講明字多圖少，望大家認同她既有「姿色」亦有「知識」！貴為「旅遊女神」，Faye每次旅行都有艷遇，但她對外籍男不感興趣，反而最愛黃皮白心的「香蕉仔」！

旅遊節目主持兼Blogger周雅霏（Faye）喜愛周遊列國，年僅24歲就已到訪近30個國家。擁有靚樣及口才的Faye深受觀眾歡迎，Instagram擁有約2.5萬Fans，被封為「旅遊女神」，今年更推出第二本遊記，抒發近三年的旅行感受。

狂野浪漫唔啱key

外形省鏡的Faye每次到外地都有艷遇，但可惜只是「襄王有心」：「亞洲面孔喺外國幾受歡迎，記得有年我同拍檔小雲去希臘識咗兩個男仔，佢哋另一日專登去機場等我哋，之後有Facebook聯絡，但冇發展。其實我出埠都係諗住做嘢，冇諗發展異地戀。」Faye指各地男士各有風味，法國男最浪漫，西班牙男最狂野，但曾在英國留學的她還是覺得與「黃皮白心」的「香蕉仔」最夾：「佢哋既有傳統思想，但亦會開放啲，同我比較投契。」

畀酒杯割傷縫28針

提到推出第二本遊記，她直言字多圖少，望大家透過文字了解其內心世界：「入面有靚相，但以景為主，文字係好多，同市面上嘅寫真完全唔同。我事業心重，但『事業線』短缺，唔想人哋覺得我係模特兒。」Faye直言三年前人生感迷失，更曾患上情緒病，最終透過旅遊尋回自己，想藉個人經歷勉勵讀者：「2013年5月我因為貪玩畀酒杯割傷背部，要縫28針同瞓咗半個月醫院。我覺得好迷失，點解自己搞成咁，之後開始去旅行，開頭係逃避，但慢慢了解各地文化，原來世界好多事係自己唔知，去到哥倫比亞，聽人唱聖詩聽到我喊，亦醫好我情緒病。」

周雅霏（Faye）Profile

年齡：24歲

身高：1米68

三圍：33B、25、36

簡歷：2011年中國小姐香港賽區最佳氣質獎，2013年起創辦旅遊節目《霏雲闖蕩》，夥拍女攝影師小雲周遊列國，亦有在網上教美容，深得Fans歡迎。

化妝及髮型：Pink@Pink evolution