【餵埋仲好】羅力威召喚雨僑搣生果

羅力威在美麗華商場出席音樂會活動，透露爸爸偶爾會帶自家種水果給他：「佢成日種生果，然後山長水遠拎出嚟畀我。（想唔想自己耕田種吓生果？）都好㗎，城市枯燥嘛，不過其實我唔主動食生果。（點解？怕搣？）其實我淨係會主動做一樣嘢，就係彈琴。（叫女友雨僑搣畀你餵埋你食？）都好，叫吓先。」

讚雨僑廚藝了得

他又謂現時想學識煮飯先：「我嚟緊想學識煮飯畀屋企人食先，但我畀人話煎蛋似廁紙蛋咁，因為我唔落油，我煮飯好渣。（會請教雨僑？）會。（煮畀佢食？）想，想煮畀屋企人食，佢煮嘢食好叻，佢家族煮嘢食都叻，我家族煮嘢食就唔叻，所以我哋個個都好瘦，我覺得稍為豐足嘅人，屋企煮嘢食都好食。」

籲大家為泳兒祈禱

另講到同門師姐泳兒在網上大呻照顧中風媽媽大壓力，他表示：「知道佢媽咪嘅事，不過呢排少見佢，但佢一定大壓力，作為外人實際都幫唔到佢啲乜，希望佢身邊朋友可以同佢分擔，最好係希望佢媽咪突然好番冇事，如果有宗教信仰嘅朋友，都可以幫佢祈禱。」