與子浩相識廿載　MayMay玩逼婚

藝人馬蹄露舉行處女個唱，獲鄭子誠、李霖恩、宇昭、澄騫、姜蓓莉、姪仔馬米高擔任嘉賓。當年她在劇集《真情》中飾演「May May」一角深入民心，她在演唱《天各一方》時，就請出劇中飾演其男友「李子浩」的鄭子誠在旁獨白，再次勾起大家對《真情》的回憶！之後鄭子誠代觀眾向馬蹄露送花，馬蹄露卻在台上向他逼婚，她笑說：「我哋兩個一齊結婚啦，我想得到你，因為我喺戲入面得唔到你。」鄭子誠即說：「你喺台上講啲咁嘅嘢，我好難做喎。」馬蹄露續說：「其實我都ok㗎。」鄭子誠笑謂：「ok，經過咗20年嘅沉澱，我完全覺得你冇問題，我哋都識咗20年喇。」

唱完另一首歌後，馬蹄露再向鄭子誠逼婚，並笑說：「我同倩怡（鄭子誠太太）都好熟，不如我做你哋嘅跟班，你唔好走呀，你要娶我呀！」逗得全場大笑！之後鄭子誠更大開金口，與她合唱《真情》主題曲。

另一嘉賓李霖恩指因為馬蹄露而有更多人認識自己，又謂平日會叫對方做「家姐」，他說：「我喺呢行撈咗16年，同過咁多人合作，佢喺我眼中係頭十名內最好戲嘅演員！」他又提到兩人在現正播放的《愛．回家之八時入席》中飾演夫婦，並謂知道網友覺得他們這個配搭好笑：「有人話雖然好嘔心，但睇落又好舒服喎。」