名人：陳美齡教仔有心得　唔靠贏在XX前

藝人陳美齡（Agnes）於灣仔會議展覽中心舉辦自己首本中文處女作《50個教育方法，我把三個兒子送入史丹福》講座，並分享了她教育三個兒子的方法。Agnes表示此書推出的源由，是自去年三子考入史丹福大學，成就一門三傑齊入讀相同學院，以致不斷有朋友查問其育兒技巧而成：「其實呢本書原本先喺日本出，結果好受歡迎，所以出版商就有意翻譯成中文喺香港出。」

要子女自立　唔信「贏在射精前」

對於近年香港教育文化，家長對子女尤其緊張，甚至有「贏在射精前」等要計算子女出生月份之說，Agnes表示這些都並非自己育兒之法，她希望子女均能自立：「要佢哋去肯定自己，要相信自己，因為你唔可以跟佢一世，唔可以幫晒佢讀書，一定要佢自發出嚟，自己鍾意讀書，讀書係令佢哋開心。有時管得佢哋好緊，操得太盡，可能佢哋會反叛，好辛苦。就算佢哋讀好多書都好，佢哋嘅童年應該係要快樂嘅。（點睇怪獸家長嘅心態？）我希望佢哋睇我本書。其實我同佢哋嘅心態都係差唔多，都係想兒女成才，希望佢哋有健康快樂嘅人生，我本書可能畀到家長一啲貼士。」

教仔女靠基本嘢

問到她可有興趣應自己的育兒心得而投資教育生意或開補習中心？她笑言不認為自己的方式能用於補習班：「可能可以開家長班就真，但依家就暫時未有呢個打算。因為依家個社會變得好快，每個家庭都有佢自己嘅方法，所以我都建議佢哋睇我本書，喺佢哋遇到有困難、迷惘嘅時候，希望會搵到啲答案。因為無論時代點變，有啲嘢都係基本，若然基本做唔好，用幾多錢、幾多時間都好難將個方針校番正。」

仔仔照跟阿媽方法教下一代

至於Agnes可會以身作則做榜樣？她笑稱自己自成為人母後變得正經，要把腰挺直不能亂來。惟在三個兒子看過她的書本後，郤不期然稍感失望：「原來好多時我同佢哋玩，做好多嘢都係教緊佢哋，係有目的嘅！不過，佢哋話第時生咗仔都可以用呢啲方法。」