羅嘉良Keep住嚴肅　鄭俊弘爆：好少傾偈

歌手鄭俊弘（Fred）日前接受電台訪問，講到近日忙於拍新劇，劇中更與「好戲之人」羅嘉良演父子，Fred坦言當初得悉嘉良演他父親角色感到很興奮。不過，因嘉良戲中角色很嚴肅及深沉，所以很少傾偈，嘉良亦有向他解釋其實都很想和他們鏡頭後去食飯「嘻嘻哈哈」，但為了投入角色，只得逼自己保持戲中情緒。Fred稱最深刻是與嘉良演一場十分關鍵的場口，大家都好用心去拍這場戲，拍完後他和嘉良都返回化妝間休息才敢鬆一口氣。而最開心是表現得到嘉良有讚賞和認同，他謂：「佢讚我做得好，大家做咗一場好戲。」

講到戲中Fred亦有動作及踩單車場面，Fred表示：「可能導演知我自小六歲開始學功夫，所以都有啲武打場面，而踩單車就有啲蝦碌嘢，就係拍一個煞車鏡頭，可能太應，搞到單車尾轆起咗，我就成個人飛咗出去，跌落地打咗個筋斗起番身，好彩又冇咩事喎。」Fred笑言想不到拍單車戲還危險過拍動作片。