重提抑鬱經歷　薛凱琪自覺係上天嘅禮物

由伍詠薇及陳皓雲主持的有線節目《伍姑娘真識食》，請來歌手薛凱琪（Fiona）任嘉賓，大談感情生活及患情緒病的經歷。

直認恨拍拖

年過三十仍感情空白的Fiona被網民評選為娛圈五大「黃金剩女」，訪問中她直認恨拍拖：「話唔想拍拖係呃你，戀愛係會令人開心，不過我每日工作密麻麻，放工返屋企仲會做好多design、MV剪片工作，根本冇時間識男仔，我甚至好明白點解咁多藝人會同助手拍拖。（擇偶太挑剔？）當然要小心揀啦，我唔係搵玩伴，係搵終身伴侶，要遇到一個用情專一，而且同自己價值觀一樣嘅男人好難！」她又澄清自己和房祖名只是非常要好的朋友：「除咗拍戲，我哋私底下連手都冇拖過，當我有煩惱會搵佢傾，佢不但會幫我守秘密，仲會用佢嘅智慧幫我解決問題。」

因病改變人生觀

Fiona早年曾患抑鬱症，她坦言這是上天給她的禮物：「當時腦海中有好多把聲音叫我去死，雖然我有睇醫生，但因為反叛私自停藥，令到病情好反覆，當時我知有好多人關心我，為咗愛我嘅人，我好努力堅持落去，呢個病改變咗我人生觀，我對名利、金錢唔再執着，我明白到快樂係要自己製造，唔可以單靠身邊人畀你，相反，我要將快樂及正能量帶畀人，亦唔好太計較自己擁用幾多，失去幾多。」伍姑娘大讚Fiona是個思想成熟、活潑單純的女孩，祝願她盡快找到人生的另一半。