網民熱話：撞樣新代表　賴慰玲VS吳沚默

世界之大，無奇不有，人有相似，有幾出奇？唔講咁遠，就講無綫，就已經有好多藝員個樣似到乜咁，當中有啲唔單止係似「人」，仲好似卡通動畫人物咁，應有盡有！搞到網民都搞咗個「明星人有相似系列」，最經典嘅「晒你冷」之作當然係分別結合咗木村拓哉、蔡思貝，同達哥林慧韡嘅「木村蔡思達」，到底佢係蔡思達定係木村貝？「木村蔡思達」到底係入男廁定女廁？對唔住，小編真係唔知道。

另外，動畫《死亡筆記》入面嘅死神流克同許亦妮嘅「流克亦妮」，亦係深入民心，只要你見到流克就會諗起亦妮，見到亦妮就會諗起流克，完全分唔開！除此之外，「鄧梓峰 VS 巴斯光年」、「鍾嘉欣 VS 吳尊」等等，亦都係出名似到十足！

新成員加入！

而最近，呢個系列又有新成員加入，就係賴慰玲同埋吳沚默，賴慰玲可能大家都有啲印象，就係喺《殭》入面做「死港女」做到入型入格，仲畀網民捧做最可愛港女嗰個，但邊個係吳沚默呢？可能大家就冇乜印象，不過其實佢曝光率唔錯，好多劇集都可以見到佢嘅身影，不過就做路人甲乙丙丁多，大家記得佢嘅角色，可能就係王祖藍套《老表，你好hea！》入面嘅醜角「烏筓」。一個係最可愛港女，一個係醜角，但係原來將兩個人張相放埋一齊，又真係似喎！

網民有話兒

Jack Lxx：蔡思達定係木村貝？

Andy Yxx：木村蔡思達，明明係同一個人嚟，唔好諗住呃我！

Emily Tsxxx： 枉我一直以為老表你好hea裏面嗰個係賴慰玲。