樂壇校長譚詠麟都有天敵？

樂壇校長譚詠麟（阿倫）不時都會相約三五知己，去有「打工皇帝」之稱嘅霍建寧大宅聯歡。而且阿倫一向都活躍社交網站，所以不時都會上載同霍建寧Jam歌嘅片段上網同大家開心Share，今晚都唔例外。

佢一口氣上載咗兩條片，片中一開頭就聽到霍建寧喺度高歌，現場有成隊Live Band喺度，相當認真，直頭好似音樂會咁，阿倫仲話霍生唱到成個歌手：「唔係我唱緊呀！歌手唱緊呀，我做和音架咋！」片中聽到霍生無論係唱《雨夜的浪漫》定係《愛情陷阱》都一樣掂，唔怪之得連喺旁邊嘅彭健新都大讚霍生唱得好，仲話：「估唔到阿倫有天敵，就係大班喇！」之後阿倫亦大讚霍生進步咗好多，然後彭健新就話：「梗係啦，一隻歌自己練六個鐘頭呀！」

唔知面紅紅嘅阿倫係咪見霍生唱得咁起勁，最後都忍唔住加入，一齊大合唱自己嘅首本名曲《愛情陷阱》，嚟個「這陷阱，這陷阱，這陷阱，偏我遇上！」