沾sir騷完美落幕　尾場超時罰八千多元

詞壇聖手盧國沾（沾Sir）的一連兩場《歌詞大師盧國沾作品演唱會》在群星拱照下圓滿結束，柳影虹獲囡囡上台送花，而李龍基大讚沾Sir歌詞鋒利刺人心，壓軸嘉賓薰妮獻唱最後一首歌《每當變幻時》，演唱會唱至晚上十一時四十分，因超時被罰八千多元，主辦單位新娛國際負責人丘亞葵坦言兩晚合共罰了一萬六千多元，眾人演出後拉隊出席慶功宴，沾Sir為答謝一眾演出歌手，特別送上刻有其歌曲歌詞的杯送給眾人。

羅嘉良表示曾經有一段長時間冇見過沾Sir，他說：「好多謝丘亞葵今次撮合呢件事，真係冇盧生唔會有羅嘉良，當時真係冇諗過做藝人，世界真係好奧妙，過咗20、30年再見面，今晚好感覺、好開心、好正。」隨即大讚沾Sir說：「盧生文筆的確好，有修養。」近日忙於拍攝無綫網劇《無間道》的嘉良透露太太及女兒日前來港探他，他說：「《無間道》要拍到九月，之後會去深圳，呢排真係好熱，好辛苦，我帶個女去尖沙咀行一陣都頂唔住。（太太同女女有冇嚟捧場？）冇，個女要瞓覺。」