出書勉勵自閉兒子　49歲陳錦鴻仲想追多個

陳錦鴻與太太杜雯惠育有一名9歲兒子駕樺。駕樺從小患有自閉症，錦鴻多年來負起照顧兒子的責任，近年更完全消失幕前，專職當湊仔公。繼數年前錦鴻執筆寫書，以文字鼓勵自閉兒家長，及與大家分享相關經驗後，近日他再推出一本著作名為《兒子教曉我的事》，據知書展期間銷情不錯。錦鴻更舉行了簽名會，獲好友張錦程一家、以及大批中學同學撐場，場面熱鬧。

送書畀銘Sir鮑姐

錦鴻接受《東網》電話訪問時坦言：「其實本書係寫畀我個仔第時睇嘅。雖然佢依家進展好好，打乒乓波好叻，講英文好過我，不過佢體內嘅自閉基因係唔會消失。呢類人最大嘅弊端係理會唔到其他人感受，所以佢成長後即使結到婚，我都擔心佢未能跨越由丈夫變為父親嘅身份，而呢本書就係我鼓勵佢生兒育女。」錦鴻坦言該書算是駕樺兒童期的總結，所以短期內不會再有出書：「暫時冇嘢好寫啦。我有送書畀一啲對我生命造成影響嘅前輩，包括劉兆銘及鮑起靜等，其他朋友就自己買啦。」

冇經濟壓力

雖然有沉重家庭負擔，但樂天的錦鴻表示：「同太太咁多年都想再追（懷孕），只係未成事啫，我想再有嘅，不過呢啲睇天意啦。（唔做嘢？）我冇經濟壓力，又未遇到合適嘅劇本，所以暫時以內地登台工作為主，況且港視仲有年幾約，係都要等完約先再作打算啦。」