18歲老外力追　陳法拉唔受忘年戀

藝人陳法拉出席「瑞典Volvo全新S90旗艦行政房車發布會」，擔任嘉賓的她於台上表示揀車如揀男友般，需要內外兼備，安全感很重要，還大讚是次擔任司儀的陳智燊是典範，出口術叫對方好好照顧其好姊妹宋熙年。

有觀眾睇舞台劇唔聽話

她續表示由17歲開始揸車，暑假會跟家人去road trip，曾試過10日駕駛2千公里，每日揸8小時，很享受駕駛的過程。問到現在揀男友是否都需要安全感？她說：「當然要安全感啦。（以前嗰啲人畀唔到安全感你？）唔好講呢啲，唔關事嘅，不過我揀得嘅都有安全感。（安全感係首要條件？）要，但都要多方面，性格要夾、價值觀啱、有共同興趣。（係咪要睇舞台劇識趣關電話？）係，要有家教、教養，因為唔係演唱會、棟篤笑，舞台劇係冇得停。（電話光）好刺眼，我哋都睇到，唔係一次，係好多次，中場休息時已經叫工作人員去提醒位男士，但佢下半場都係繼續，子華（黃子華）都好苦惱。（有冇被影響表演情緒？）因為係兩個人嘅互動，自己都驚情緒建立唔到，不過最後冇事，有人叫「特種兵」嗰日只係一次，都冇事可以投入到。（之後會否刻意提醒觀眾？）99.99%嘅觀眾好乖，所以我先係facebook提醒大家。」

9月返美開學

談及其從美國回港演出即成為TVB的搶手貨，她笑說：「抬舉我啦。（唔係有見面傾過咩？）冇見過面，都冇見過任何經理人，因為我喺美國讀書仲有2年，9月1日就要返去開學，所以長期嘅project接唔到，電影都推咗好多，真係冇時間做。（咁咪損失好大？）有得着嘅，讀書係自我增值，好值得。」又謂自己醉心演戲，為將來畢業返港可演更多好戲好角色而作準備，但現時都希望有多些人找自己拍短廣告及短電影，聖誕都有10多天假期。再問到TVB有否找過自己？她說：「未有人接觸過我，但有接觸過我公司，不過真係撞晒期。（話梅小青同余詠珊爭你！）唔知，唔清楚，我返嚟都係收埋自己，因為要綵排演出，連朋友都冇見過。」

祝福前夫薛世恒

問到可知前夫薛世恒有D cup新女陪過生日？她說：「佢嘅嘢問番佢自己，我冇留意。（仲有冇聯絡？）有聯絡，仍然係朋友。（祝福佢？）當然祝福佢。（咁你幾時有新男友？）喺紐約有人追我，有個仲係18歲，佢都夠膽死，係老外嚟嘅，同學仔，我想講如果我15、16歲都生得佢出呀。（你接唔接受忘年戀？）梗係唔得啦。（有冇向你表白？）成日約我，鍥而不捨，不過小朋友我識應付。」又笑言覺得給如此年輕的男孩追求，自己的心境好像年輕了。