黃奕晨要撇甩「夏雨仔」之名

資深藝員夏雨的兒子黃奕晨（Dixon）現正在ViuTV擔任主持，負責過的節目相當多，包括資訊、增值、冒險及體育節目，他直言暫時仍是新人尚未有定位，因此願意作多方面嘗試，講到最難忘的主持經驗，他認為是主持真人騷節目《SE7EN》，每集主持都會輪住完成各種甚考體力的夢想！Dixon說：「我去晒香港179個離島，相信冇咩人有機會有人畀錢你去晒，無論咩天氣我都照去，愈玩愈投入，呢個係我人生一個重要嘅里程碑，我會記得26歲嘅我挑戰咗呢件事！（本身性格都咁熱血？）其實我本身比較懶散，可以全日歎冷氣，不過一旦我覺得要做，就要即刻做，因為唔想後悔。」另一個節目則是《借宿一宵》，Dixon要在不同亞洲國家敲門借宿，問到有否被人視作色狼？他笑說：「冇丫！因為全部都係男士！其實墾丁嗰度有好多比堅尼女郎，但所有女士都拒絕晒我架喇！」

童年時爸爸太忙

講到父親夏雨是無綫視帝，演戲經驗豐富，問到有否被父親影響而也想入行？Dixon卻表示目睹父親忙個不停，反而令他不想加入娛樂圈：「佢係忙到冇收工時間，如果要拍劇，可以幾個月見唔到佢，之前佢又會上身咁不停讀劇本，令我知道做演員唔係咁簡單！當然爸爸其實好好，有盡量抽時間陪我哋，寧願唔瞓覺都陪我溫書！」

夏雨教仔玩磨練

Dixon始終遺傳了父親口才及大膽，最終亦加入了娛樂圈，他說：「記得當年爹哋贏到視帝後返溫哥華，當地有電視台訪問我哋，我都有上鏡，爸爸覺得我第一次對鏡頭講嘢都咁順，幾有天分，覺得可以試下入行，結果我就返香港加入咗now。（點解當時唔跟爹哋返無綫？）呢個又係另一個故事，可能佢覺得要磨練吓我，想我去收費電視台拎經驗先，而且喺無綫比較大壓力。」

對於經常被稱呼作「夏雨仔」，Dixon笑言當初相當介意，但現在覺得沒有所謂，他笑說：「依家諗吓都唔係咁差，大家知道之後都會話我靚仔過阿爸喎！哈哈！而且呢行係要靠關係，當然呢個只係入場券，做得唔好都唔會有下次，我會畀心機，相信有一日，有人會叫我爹哋做『黃奕晨老竇』！」

場地：MAGE Kitchen