「岳史迪」再臨　李美佐斯回歸電視圈

「岳史迪，太空人，失事之後受咗重傷。 經過醫生嘅診斷，認為可以改造佢，令佢變成一個左眼右手雙腳都與眾不同嘅超人。 呢次改造卒之成功，岳史迪依家，堅強敏捷，智勇雙存......」，以上呢句旁白係70年代在港瘋魔一時嘅美國配音劇集《無敵金剛》(The Six Million Dollar Man）每集嘅「開場白」，當年劇集在香港紅到爆，後來連周星馳嘅《百變星君》故事都要「參考」下《無》。查實多年來已有傳美國型男佐治古尼（George Clooney）及麥克華堡（Mark Wahlberg）翻拍《無敵金剛》的電影版，但一直只聞樓梯響。至今仍未有動靜！

而在劇中飾演「無敵金剛」岳史迪（Steve Austin）一角嘅男主角李美佐斯（Lee Majors）最近東山復出再戰「公仔箱」！現年77歲嘅李日前亮相在加州舉行的電視評論協會（TCA）夏季劇集宣傳活動，宣傳佢有份參演嘅《Ash vs Evil Dead》第二季，佢在劇中飾演Ash（Bruce Campbell飾演）嘅父親，已有一段時間無公開亮相嘅李美佐斯仍然有型有款，在活動上佢話初時以為個劇純粹恐怖，但原來好搞笑。該劇係80年代cult經典《鬼玩人》（Evil Dead 2）外傳。