名人：陳美齡復出樂壇遇低潮被誘拍寫真

歌手陳美齡（Agnes）14歲在香港一炮而紅，16歲獲邀到日本發展，曾於1973年至1975年連續三年殺入日本樂壇殿堂的《紅白歌唱大賽》，當年陳美齡在日本當紅程度，足以跟山口百惠媲美。談到76年她忽然在港宣布引退往加拿大升學，Agnes在電台錄音訪問中回憶當年的決定，她坦言很矛盾：「呢個唔係我嘅心願，係爸爸嘅意見，當時爸爸見我忙得要命，冇休息亦識唔到朋友。加上一出道就紅咗，佢擔心我會自以為是，變得驕傲，仲話：『名氣同金錢會隨時消失，入咗腦嘅知識先係一輩子嘅寶物。』如果走咗兩年，咩都冇咗，就證明我根本冇實力。」

至於當時在香港宣布消息，陳美齡直言決定令經理人震怒：「係嬲到癲！第二日已經有十多個人飛到香港坐喺我面前。當時冇考慮咁多，只認為自己係香港人，咁重大嘅決定就應該喺香港發表嘅。諗番當年，我覺得都係年少太衝動，非常對唔住佢哋。」

返日遇低潮期　轉戰廣東歌

1978年，完成兩年大學課程的陳美齡返回日本藝能界，她承認那階段正是她事業低潮，她說：「嗰時爸爸已去世，冇咗阻力，加上想安慰媽咪，就返到日本再發展。但嗰個地位唔係你想返去就有，唔係你繼續唱就可以。」她更透露低潮期，日本經理人曾游說她出寫真：「經理人有游說（拍寫真集），又要我唱一啲較女人嘅歌，但我一一拒絕。其實當時重返日本樂壇嘅心態唔係太正確，根本唔會做得好。」

在日本事業不順下，陳美齡79年獲香港娛樂唱片之邀灌錄廣東專輯《雨中康乃馨》，原來，這才是她第一次灌錄廣東歌，也展開了她事業新一頁，她說：「之前都係唱英文歌國語歌，第一次唱廣東歌嘅時候，覺得心驚膽顫得好犀利，感動到想喊，好似返到一個屬於自己嘅地方，先發現廣東歌係自己最喜歡唱嘅歌。」

曾收死亡恐嚇

陳美齡除了76年引退及86年下嫁日本經理人金子力哄動日本藝能界之外，她86年婚後及產後帶子工作，也在日本社會掀起了持續兩年的「美齡論爭」，對此她說：「當時真係議論咗兩年，好多人覺得我應該好似山口百惠咁，生孩子後就應安份守己喺屋企相夫教子；但我喺香港長大，好多媽媽生孩子後，包括演員都會繼續工作。當咗媽媽後，都想一面工作一面照顧孩子，從未諗過要退休。」

嫁到日本多年，先後為丈夫生了三個孩子，陳美齡一直宣揚和平，曾經公開展示南京大屠殺照片，觸動日本人神經，2015年，她更受到死亡恐嚇，指她一邊從事慈善工作，一邊過着富裕生活。問到今天日本人接受她了沒有？陳美齡坦言：「日本人應該好珍惜我唔係日本人，我唔係接納所有日本文化，雖然我覺得政黨過於激進，但其實佢哋大部分都係愛和平，佢哋都好喜歡我，世界和平、人類大愛唔應以國家區分，呢啲係我嘅理念。」

感激丈夫無限支持

無論從前的任性，或經歷07年患乳癌的挑戰，陳美齡感激身邊的日籍丈夫金子力一直在身邊無限支持跟包容，她坦言丈夫只適應日本生活，未有回港的念頭，去年孻子也考入美國史丹福大學，她的教育重擔已放下，這次回港宣傳新推出的書後，她仍會致力做義工，繼續爭取世界大同，宣揚和平，及散發正能量。