黎美言拍G1周身傷 媽咪叫轉行

20160816
東網電視
更多新聞短片
Winkie接拍西片,挑戰用英文講對白。
藝人黎美言(Winkie)從歌唱組合HotCha至現時獨立發展,經歷過高山低谷,更曾因為收入不穩定,情緒受困擾而患上情緒病,在MMA真人騷《G-1格鬥會》比賽期間,身、心都傷痕纍纍,但抱着堅毅不屈的精神,由被稱為「HotCha個妹妹」轉型成為「打拳個Winkie」,讓她在電影圈發揮打女本色!
拳傷纍纍 媽咪關心
Winkie早前參加格鬥真人騷,一個女人仔付出汗水、淚水兼傷痕纍纍,究竟為了甚麼? 「之前拍到內地網絡電影《奇幻偵探》真係好開心,因為憑住自己努力,第一次做女一,由唔識打拳,到參加《G-1格鬥會》打比賽,成身瘀晒都覺得值得。參加比賽嗰三個月係地獄日子,係我入行以嚟最辛苦嘅時間,就算籌備演唱會都冇咁大壓力,比賽壓力大到身、心都好疲累。每日操六個鐘以上,真係好似拳手咁,之前仲患咗胸膜炎,成日打到周身傷痕,唔知為咩!加上因為自己住,返到屋企又要做家務,屋企雖然有養狗仔,但根本攰到唔想講嘢,甚至攰到行唔郁,連同朋友食飯嘅機會都冇,嗰段時間疊住自己生日,都唔想出街慶祝。
開頭參加比賽冇諗過要得到啲咩,只係想挑戰自己。比賽之後的確多咗人認識,之前啲人會話『你咪HotCha個妹妹』,依家啲人見到我會話『你咪打拳個Winkie』,係成功轉型。諗番入行十年喇!高山低谷都試過,由HotCha出道反應新鮮,直到組合解散,嗰時情緒係好困擾,又唔想將負能量帶畀人,成日自己匿埋屋企喊,收入亦好大上落,搵錢唔穩定,連媽咪都叫我轉行。」
坎坷過後拍西片
辛辛苦苦練拳,原來一切都是值得,除了鍛煉正能量和修身外,更帶來意想不到的機會。
「轉咗新公司兼參加《G-1》,令我形象轉變之餘,打拳亦令我對生活嘅態度有改變,因為以前嘅我好容易半途而廢,依家嘅我比以前成熟咗。年頭仲趁放假去咗考泰拳教練牌,除咗修身靚之外,仲可以打沙包發洩,將唔開心嘅情緒拋諸腦後。最意想不到嘅係,竟然個牌帶到畀我一部電影,好多謝幫過我嘅人。嗰段時間,屋企人為咗我好心痛,因為我嗰時情緒唔好,有好多負面新聞同是非,靠自己辛苦咁捱過。值得嘅係我多咗好多演出機會,早排接咗套西片,首次以英文對白演出,今次係挑戰流利嘅英語。雖然我大學係修讀英文同法文,但係語文要成日用先唔會生疏,所以最近睇咗好多西方連續劇惡補一下。」
日夜苦練出單曲
除了電影工作,HotCha出身的Winkie有機會推出單曲,令她喜出望外!
「開心嘅係將會推出單曲,原先都冇諗過有機會出歌,因為依家都係拍電影為主。HotCha解散後其實好期待自己會唔會有個人歌曲,但之前市道差,唔好話出唱片,出一隻單曲都需要好多資源同宣傳。好多謝Marie (諸葛紫岐)欣賞我唱歌同跳舞,試吓畀我出歌,隻歌練咗好耐,連拍戲都帶埋歌詞去練。我好鍾意演藝事業,唱歌同跳舞就係我嘅全部。你問我想專注拍電影定唱歌,現時我會想專注電影,唔同階段、唔同年紀有唔同角色想試吓做。其實入行嗰時已經對拍電影好有興趣,曾經喺《愛得起》演出過,導演讚我做得幾好。嗰時出道冇耐,有時就係試過成功,先會敢繼續做落去,但無奈入行主力以唱歌同跳舞為主,冇乜機會可以拍電影,只得客串角色。」
後記:酷熱拍攝冇怨言
Winkie沒有明星架子,反而感覺仍然像個充滿幻想的少女。雖然在三十多度的炎熱天氣下拍攝,但她依然表現專業,沒有半句怨言,還指導攝影師為她拍攝更多生動的照片。Winkie不停跳跳紮紮,擺出多個搖曳生姿的甫士,讓攝影師能多角度捕捉Winkie最自然、最美的一面。
化妝及髮型:Qetsiyah Lam@MAKE UP FOR EVER ACADEMY HONG KONG
服裝:Snidel
場地:Hooray Bar and Restaurant