條腰唔夠人幼　單文柔唔敢再偷食

《2016香港小姐競選》十強佳麗現正於日本福岡拍攝外景，佳麗們首度以泳裝示人，當中（10）單文柔（Phoebe）以三點式亮相，擁33／24.5／35.5三圍的她身形均稱，但臉部明顯有Baby Fat，身形尚有進步空間。

對於首度以三點式示人，Phoebe大呼緊張：「好少就咁着三點式，平時會喺外面着T恤短褲遮吓。（個性保守？）係呀，有少少，我本身都係怕醜妹。（對自己身形滿意？）滿意㗎，唔算標青，但勝在均勻。（覺得自己有乜優勢？）覺得自己對眼友善有神，但條腰依家25吋，想再幼啲，見到其他女仔超幼，22、23吋，冇得偷雞再食朱古力喇，前一晚食咗1、2粒朱古力。」

問到最欣賞哪一位佳麗，Phoebe大讚（2）劉穎鏇與（5）蘇韻姿，她笑說：「佢哋身形均勻又有陽光氣息。（視為勁敵？）都會㗎，好欣賞佢哋，形象好陽光，笑容好甜美。」