花曼秒殺春美　網民：點解唔一早出手？

無綫劇集《城寨英雄》早前彈出個「超能煞姬Lucy欣」（胡定欣）雙刀萬斬一個打廿個，不過原來呢個世界真係沒有最勁只有更勁，當連「Lucy欣」噚晚嗰集都畀大佬春美哥（吳家樂）打到一仆一碌陰公豬之際，就有一位女高手幾招就打死春美哥，呢位就係花曼（王君馨）！

花曼噚晚同「Lucy欣」一樣以一身「黑寡婦」裝扮現身，仲幾招就打死咗全劇人打咗18集都打唔贏嘅春美哥，仲一把火燒埋佢條屍！吓？咁就打死咗？網民話：「既然佢咁好打，做乜唔一早出手，又要埋春美哥身邊做無間道，搞咁多嘢做乜？」咦...係喎，好似又有啲道理，不過如果係咁套劇就第一集就全劇終啦，邊有咁多爆肌睇？咁依家春美哥死咗，套劇又未完，識睇嘅都知好明顯係有個大大佬未出，到時大家又有得睇班主角「超能覺醒」，下一個會唔會係細細個畀人打到傻咗嘅小智呢？你知啦，呢啲嘢真係好難講架嘛！

蛇腰屈機

另外，TVB今日喺Facebook上載咗一張《城寨英雄》攻擊力指數圖，雙刀萬斬「Lucy欣」嘅攻擊力只有400-600，而爆肌牙佬（袁偉豪）同爆肌貓仔（伍允龍）都係得250同300，反而拳佬（陳展鵬）喺一般形態下只係得100，但係喺危急狀態下使出絕招時，攻擊力指數上到1000！冇辦法啦，主角打不死呢啲，你懂的！

而幾招打死春美哥嘅花曼呢？一般狀態下佢就有250攻擊力，而係危急狀態嘅攻擊力指數就冇寫幾多，只係寫住「超強」（搖骰時能將所有宅男KO），咁到底佢有幾勁？有玩《Pokémon GO》嘅都知，真心勁嘅小精靈，通常個CP值都係「CP？？？」，而且網民話唔理佢幾勁，睇住佢條20.5吋腰打功夫，已經可以即刻心甘命抵畀佢打死，咁仲有邊個夠佢打？

網民有話兒

Kxxxxxu Wxxx：佢終於等到個好爆ge（嘅）角色

Txxxxa Chxxxx：其實花曼一早出手打死佢咪得，洗（使）乜搞咁多嘢，又死咁多人

Bxxxxra Kxx：每次聽到春美哥把聲已經毛管動（戙）！出場未打已驚咗你，家樂你係得嘅！加油

Wting Kxxxx：拳佬牙佬泰婆貓仔花曼一齊出手乜人都死啦，可以一個人都唔使死

Natalie Wxxx：點解花曼追殺春美哥仲會有時間換衫？