隨時有驚喜！郭富城爆智能舞台未玩盡

舞台王者郭富城假紅館舉行的《郭富城舞林密碼世界巡迴演唱會2016香港站》首場已順利完成，受訪時，城城指這次的智能舞台其實仍可以有其他變化，但未能一一呈現，又謂希望不論坐山頂、山腰及山腳的觀眾都能感受到他的用心：「大家唔使擔心，開心先係，山頂嘅人應該估唔到會同我平排咁睇我跳舞。」提到他在個唱上的「高」難度演出，城城透露其實有帶安全帶：「條安全帶係隱形咗嘅，喺我後面，係威吔嚟嘅，我哋拍戲其實高好多?，我都吊到麻木咗，同埋特技組嘅人都會負責我哋嘅安全，好細緻咁check清楚，確保我哋可以安全落返嚟。」

測量師計算力學

城城透露其實可以吊得更高，但他們追求的是效果和美感：「我諗最高去到2層樓啦，唔會好高，但我哋身邊冇嘢，睇落去會好似恐懼啲同刺激啲。」又指這次舞台的台架上粗下幼，事前找來測量師計算好力學，雖然舞台轉動時會搖，但亦同時可幫助卸力。

自我突破X3

提到他在個唱上非常感觸，城城坦言因籌備這次個唱十分困難：「我哋要諗點樣去突破『舞林』系列第四個嘅演唱會，我要衝破3次自己去做今次嘅演唱會，所以壓力係大咗嘅，呢個壓力係嚟自我自己，我想對得住大家，又畀大家感受到我係會繼續努力，觀眾入嚟嘅時候好多時會自動自覺，唔係要我叫佢哋點樣，佢哋真係好團結，好錫我。」

淚水化力量

又指差點忍不住落淚，但自己頂住：「如果我要流眼淚，不如將佢變成動力，去做好自己，係我對大家嘅承諾。」城城謂最令他感觸的，是他邁向入行26年，而這次是他第8個紅館個唱：「人生有幾多個26周年？再過26周年，好話唔好聽，可能我都『ham』咗，呢幾年好多重要嘅人或者演唱會嘅朋友離開咗，我仲可以企喺台度同大家表演，係值得嘅。」