花曼之死引爆網民情緒瘋狂洗版

無綫劇《城寨英雄》引爆全城熱話，當中劇情更成為唔少網民茶餘飯後嘅話題！而最新一集《城寨》就講到由王君馨飾演嘅花曼被奸人所害，仲要死喺飾演花曼哥哥拳佬嘅陳展鵬隔籬，拳佬更因為畀殺手用掌打中頭部而失明，連妹妹死咗喺自己身邊都未能第一時間發覺，不停搵阿妹，劇情奇慘無比，催淚非常，網民仲睇到極肉緊，加上劇情上兩人失散多年，相認咗都唔夠幾集，不禁令人戥呢兩兄妹可憐！

「花曼之死」呢一幕一出，一向緊貼進度嘅網民當然睇到喊咁口，唔少網民都即刻上《東網巨星》FB專頁上洗版「哭喪」！見到佢哋都睇得非常投入，有人話劇情太慘，好人冇好報而話要罷睇，亦有人話睇完呢一幕喊足成晚！

當中更有接受唔到事實嘅網民FF咗之後劇情，話其實花曼嘅死其實係一個局，最尾會成棚人喺天台BBQ，仲會一齊跳起對住鏡頭「Yeah」?！希望呢位網民願望成真啦。

而即將播出嘅《城寨英雄》（26集）亦會講及另一位人氣角色-貓仔（伍允龍飾）喺準備向由劉佩玥飾演嘅柯德莉求婚時被殺，相信到時又會有唔少網民為佢「哭喪」。