【結婚睇緣分】卓韻芝為婆婆主動出櫃

20160827
東網電視
更多新聞短片
阿芝宣布出櫃原來係為咗婆婆。
藝人卓韻芝(阿芝)於麥花臣場館舉行Talk Show,騷後接受訪問時,談到阿芝在show內自爆出櫃,問到女朋友可有到場睇騷,她說:「梗係要來睇同埋打點吓。(拍咗幾耐?)拍咗冇耐咋嘛,但識就識咗好耐。(圈內人?)唔係圈內人,如果係明星會同大家講,其實我唔係話要自爆,只不過呢件事代表到我對婆婆嘅尊敬,我諗過好多嘢去講但係冇一件事可以講得到佢嗰種氣量,同埋佢點樣去接受到所有嘢,我記得同佢講完我差啲感動到喊。」
主動表白追女仔
問到阿芝有冇帶女朋友返去見婆婆時,她指婆婆都認識對方,因為一直都係朋友,覺得更加冇需要隱瞞,所以選擇直接同婆婆講:「冇諗咁多架啦,拍個拖開開心心先啦!(點解突然轉彎?)其實都唔知道,其實識咗佢好耐架啦,突然間有一刻覺得自己可能係鍾意佢嘅,有少少後知後覺咁樣。(好大吸引力?)咁係我心目中佢梗係好靚啦,但我記得細個嗰時都有鍾意人嘅,暗戀啲女同學咁嘅,我係一個溝唔到女嘅雙性戀者,個緣份咁咪順住去囉。(係你開口話一齊先?)係呀。(點表白?)最典型嗰啲話我好似有啲鍾意你嗰啲囉,好老土嘅,去到嗰啲位都會驚驚地,會害羞囉。(女朋友不嬲都係鍾意女仔?)唔好公布佢啲嘢喇,係我自己問吓得唔得囉,搏吓囉。」
結婚睇緣分
提到行街有可能會畀人影,阿芝覺得依個世界冇乜所謂,因為學咗婆婆嘅豁達,做人要輕輕鬆鬆,唔好自尋煩惱,笑說:「唔驚架啦我哋有何韻詩呀嘛,有佢幫我頂住。(暗示結婚未?)咁又未,拍下拖先啦,感受吓先,睇緣分如何先啦。」