《城寨》歐瑞偉唔錫身 決戰龍成虎堅捱打

20160827
東網電視
更多新聞短片
伍允龍(左上圖右)打得就係人都知,畀佢踢一腳認真唔嘢少!

無綫熱播劇集《城寨英雄》踏入尾聲,劇情高潮迭起,每晚愈趨緊張,而尋晚「龍成虎/貓仔」(伍允龍飾演)大戰Big Boss砵仔糕老闆「楊竹鑾」(歐瑞偉飾演)一幕,更加睇到人熱血沸騰想即刻衝入部電視機打爆歐瑞偉。

雖然呢一場打戲拍得好緊張,不過有網民就指「楊竹鑾」畀全城寨最好打嘅拳王「龍成虎」打到陷入牆,卻絲毫無損嘅劇情未免太誇張,網民仲話「楊竹鑾」簡直係「不死人」,要打敗佢,恐怕要出動超人或Batman先至搞得掂……

網民睇得肉緊,自然晚晚剝花生討論劇情,但其實一套劇集嘅成功,台前幕後工作人員背後嘅努力亦不容忽視。就以「龍成虎」VS「終極大佬楊竹鑾」一幕為例,歐瑞偉為咗呈現最好嘅效果,不惜大量打戲拒用替身,《城寨》監製文偉鴻喺Instagram透露:「歐瑞偉為了演繹武功鐵布衫,大量捱打鏡頭親身上陣,不單要打的好看,捱打的更為真實,尤其是他面旁硬食一腳的慢鏡,冇花冇假!堅!請大家掌聲鼓勵!歐瑞偉,好嘢!」

現年54歲嘅歐瑞偉其實本身係體操運動員,後嚟成為龍虎武師同武術指導,因被睇中邀演86年無綫劇集《真命天子》而入行。入行多年嘅佢演過好多綠葉角色,好似古裝片大俠、警察、消防員等,但一直未受注目,直至2001年參演劇集《尋秦記》,飾演「陶方」一角而令人眼前一亮。而2012年起,歐瑞偉於無綫處境劇集《愛·回家》飾演「KC」同2016年《城寨英雄》「楊老闆」而為人熟悉。