許廷鏗王子涵Sweet爆擺「婚宴」

藝人許廷鏗（Alfred）、王子涵（Ada）出席「譽宴．星海揭幕典禮及酒會」，作為代言人的Alfred與Ada就以一身新郎及新娘的裝扮在台上切蛋糕，場面Sweet爆。Alfred指覺得這個場地適合年輕人舉行婚宴，又提到近日收到很多「紅色炸彈」：「好多同學結婚，仲話生BB，我就未諗呢啲。」

恨搞比堅尼婚禮

問到理想的婚禮？Ada說：「其實啲婚紗好Hea，我啱啱諗到可以玩Beach Wedding，着比堅尼嘅。（對身材有信心？）到時就會積極減肥，始終一生人一次，我會去到最盡，減到最完美為至！」又指比起大半年前與Alfred拍廣告時肥胖了：「我有做Gym同打泰拳，希望係結實咗啫。」至於現時可有對象？她激動地說：「未呀，好擔心，係有人墊底嘅，就係我家姐，所以我唔算急拍拖嘅，想拍拖但係都要搵啱先。」又指年紀愈大，可以挑選另一半的範圍愈細，所以很擔心。Alfred即笑她不急拍拖但急結婚，而他自己就不急於結婚：「男仔好少少嘅，大啲Man啲，同埋我對上都仲有阿哥未結。」

盡量少飲酒

提到近日在網上引來熱話的「斷片酒」，Ada指看到吳幸美試飲該酒後又笑又喊，但自己不好酒，所以不會喝：「我年少無知嘅時候試過飲醉，但好彩有好Friend嘅朋友喺身邊。」Alfred亦謂少飲酒，問到以後飲酒可會小心？他笑說：「係小心啲朋友玩嘢。」