劉嘉玲辨別真假梁朝偉：睇姿勢睇胸肌！

網上瘋傳有「兩個梁朝偉」同時出現嘅現場相，實情當然一個真一個假，係影帝梁朝偉（偉仔）同替身餅印一樣，網友們都分辨唔到邊個「真．梁朝偉」，仲話相信連梁朝偉太太劉嘉玲亦難以分辨真身。

見過替身

劉嘉玲接受《東網》電話訪問，佢睇完張相，話一眼認出老公係邊個，更冧爆話：「一眼睇得出啦，從身形、腿形、胸肌同姿勢各方面都睇到有分別，好似偉仔嘅胸肌橫啲，因為佢做開GYM。（個替身同偉仔似唔似樣？）確實幾似，都有八成似。」劉嘉玲梗係見過梁朝偉替身「真身」，連佢都話替身有八成似真偉仔，睇嚟佢哋真係好似樣！

曾經認錯人

嘉玲仲話人有相似不足為奇，自爆誤認過一名男星嘅替身為真身，最後同個替身傾偈先發現自己認錯人。問到嘉玲同老公低調約會時被傳媒發現，會唔會考慮搵偉仔嘅替身「調虎離山」，佢笑言：「都幾得意，不過唔會，偉仔份人好低調。」