緋聞傳足廿年　舒淇馮德倫情路兜兜轉轉

舒淇與馮德倫喺1997年合作電影《美少年之戀》而傳出緋聞，緋聞傳足廿年嘅佢哋，雖然次次都只認對方為「好朋友」，不過最終感情昇華至夫妻關係，今日仲宣布已經拉埋天窗，恭喜晒！

1. 感情萌芽

1997年，舒淇與馮德倫拍攝電影《美少年之戀》後傳出緋聞，當時馮德倫更被拍得到訪舒淇香閏，不過佢哋例牌否認，後來緋聞亦不了了之。

2. 各自搵食

其後佢哋各自有新戀情，舒淇與黎明喺1998年合作電影《玻璃之城》而撻着，不過一直玩地下情，作風低調，直至2005年黎明宣布與樂基兒拍拖，舒淇同黎明嘅七年情亦告一段落。單身嘅舒淇不愁寂寞，同年傳出與張震拍攝電影《最好的時光》時撻着，當時舒淇更許下非君不嫁承諾！

至於，馮德倫喺1998年同莫文蔚拍拖，不過2007年莫文蔚於台灣舉行音樂會時，單方面宣布分手，結束9年情。翌年馮德倫同台灣女星徐若瑄傳撻着，有指馮德倫更展開電話及MSN攻勢奪得美人歸！

3. 復合

2009年，有指馮德倫開始以魔術攻勢追求舒淇，雖然二人否認兼認對方係「好朋友」，不過就被拍得多次孖住夜蒲。2013年，二人更被拍得「蜜」遊日本，終令戀情浮面。

4. 戀情浮面

2014年，舒淇突然上載馮德倫登堂入室與愛貓May May Boy對望開餐照，及後馮德倫坦認貓貓係送畀舒淇嘅聖誕禮物，仲為愛貓開設Facebook專頁，而舒淇亦不時晒與「定情貓」喺屋企嘅合照，但照片多數唔係自拍，令人懷疑馮德倫其實係「攝影師」。同年，馮德倫再被拍得帶May May Boy到寵物店沖涼，後來返舒淇香閨，猶如「男主人」。其後佢亦被發現變身「柴可夫」，經常接載舒淇出入。

5. 愛得甜蜜

2015年，舒淇喺台灣出席活動時透露自己單身，加上與彭于晏嘅緋聞傳得熱哄哄，一度有傳佢同馮德倫分手。不過，今年6月舒淇突然喺社交網晒出與馮德倫嘅合照，原來二人拍拖睇海時被傳媒影到，所以舒淇索性公開「蜜」照。