陳凱琳裸泳都冇用 展鵬嘉欣搶晒焦

20160903
東網電視
更多新聞短片
大家有冇喊埋一份?

無綫重頭劇《巨輪II》現正播出,新加入嘅陳凱琳(Grace)喺尋晚首度登場,仲獻出第一次,背對鏡頭剝衫入泳池裸泳,雖然燈光暗淡睇唔清楚佢嘅美好身段,但都足以令一眾男性觀眾睇到入晒神,睇到眼都唔眨吓!雖然Grace嘅裸泳場面夠晒吸睛,不過尋晚最有話題性、最令觀眾Like爆,反而係陳展鵬同鍾嘉欣重遇嘅感動一幕!

喬天生(陳展鵬飾)同卓靜(鍾嘉欣飾)嘅感情線早於《巨輪》已經備受關注,劇中佢哋成為一對,攜手經歷過卓靜患上沙士等事件,可惜最後未能開花結果,搞到一班觀眾Sad爆喊濕幾包紙巾!不過,今次編劇終於順應民意,還呢對螢幕情侶一個Happy Ending!

尋晚嗰集講到卓靜下落未明,天生同羅威信(蕭正楠飾)遠赴日本沖繩搵對方嘅足述,仲被告知卓靜已經過身,吓!唔係掛?梗係唔係啦,如果咁樣死咗就冇嘢睇啦!原來只係卓靜遇上交通意外,導致下半身癱瘓,但佢為咗唔好拖累天生,所以先叫人幫佢隱瞞,幸好呢對苦命情侶之後重遇番,天生得知真相後,仲攬實卓靜,仲同佢求婚:「你唔係包袱,你知唔知我冇咗你,我好似冇咗人生目標咁,好似個空殼咁。你嫁畀我好冇?等我照顧你。」相當催淚同感人!之後仲有佢哋喺教堂結婚嘅Sweet爆場面,滿足一班劇迷嘅心。

而唔少網友見到佢哋有情人終成眷屬,有個完美嘅Happy Ending,都忍唔住爆喊呀!仲話呢幕太圓滿,喺佢哋心目中劇集好似播咗大結局咁,有網友笑言:「《巨輪II》播咗五集就大結局,真係經典。」由於展鵬同嘉欣今次只係客串,之後甚少喺劇集出現,網友們亦唔捨得,仲希望佢哋嘅故事可以繼續演落去。

網民有話兒:
WoodyXXXX:昨晚車廂相遇,兩個好戲都不得了,我都跟住嘉欣喊。
XXXLeon:昨晚的車廂重逢真是太催淚和感人了,終於看到Sam和Rachael淒美但完美的婚禮。
MonXXXheung 這對銀幕情侶終於完美落幕了。
XXXLinLam:《巨輪II》播咗五集就大結局,真係經典。
紅辣X:如果展鵬和嘉欣可以一直演下去就好了,真的很喜歡這一對。