同男友鴛鴦戲水被影　岑麗香嗌玩「3P」

藝人岑麗香（香香公主）和黃心穎在將軍澳出席無綫劇《為食神探》之「為食求愛三點三」活動。香香在訪問中就指對收視頗滿意，問如何谷收視，她即笑謂：「今日落雨冇得着Bikini啦！」而心穎就指自己在劇集裏會愈來愈奸，特別是與香香的「床上戲」時個樣會特別奸：「睇番自己個樣都覺得驚！」又指做奸角比想像中難，但好好玩。

嗌影相者一齊玩

談到香香之前與男友強強在台灣旅行時被影，兩人在泳池內的舉止亦非常親暱，香香就指當時着比堅尼是非常正常，更笑指影相者應該加入一齊玩，而心穎亦力撐香香：「我都覺得冇問題！正常人做正常嘢！唔咀男朋友咀邊個！（你都會咁？）點解唔會，但我唔識游水。（佢同男友好親密！）正常呀！」談到心穎早前指自己有心儀對象，問對方是否已追求成功，她大賣關子：「唔知呢！」

阮浩棕畀心穎扯痛

另外，同樣在劇中與香香、心穎有感情轇轕的阮浩棕就在台上被兩女「狂搶」，事後他更笑指心穎非常大力：「佢出全力拉住我，有啲痛！」談到現實生活中有否遇上兩女爭自己，他即指自己好守規矩：「未發生過，可能我唔夠吸引！」又笑指自己不會爭女。