黃耀明邀Conchita Wurst做大使撐平權

歌手黃耀明、林耀聲、游學修、王若琪、國際知名變裝歌手Conchita Wurst等出席爭取同志平權的「一點粉紅」活動新聞發布會。黃耀明在台上致送紀念品給Conchita Wurst時，順勢邀請他擔任活動的國際大使，而Conchita Wurst亦一口應承。而何韻詩原定會出席發布會，但大會指因她要拍MV而未能現身。

作為主辦「大愛同盟」創辦人的黃耀明指今年已是第三年舉辦活動，又謂去年的參與人數比第一年多，希望愈來愈多人參加：「希望人數可以畀啲壓力去推動啲平權措施。（差啲咩？）好多，反歧視，都未咨詢，好多歐美國家都有同性婚姻，台灣都傾緊，香港就未，一切都慢人幾拍。」

而黃耀明透露，剛在加拿大結婚的王賢誌及其同性另一半Kevin已落實於9月25號的活動會一起現身支持：「我之前有同佢提過，一路有WhatsApp佢，佢好願意，係怕時間難就，依家就到，好開心佢哋兩位會喺呢度。」

問到是否仍有同志向他訴苦？黃耀明笑謂：「依家好少啦。（工作上有改變？）冇咩改變，自己嘢自己搵自己做。（唔敢再講太多？）唔怕，唔講我會畀人斬，總之大家一齊為所愛嘅爭取。」