向徐小鳳偷師　林二汶激減54磅影海報

歌手林二汶於10月21至23日假麥花臣場館舉行《林二汶PEOPLE LIKE US音樂會2016》，早前二汶為演唱會拍攝海報，及為演唱會同日推出最新廣東碟拍攝封面照，她打大友情牌邀得香港著名造帽師Jaycow Milliner為其打造一個非常精美頭飾，但下身就只以一塊簡單黑色布包着扮晚裝，豈料效果奇佳，在場工作人員無一不驚歎，一個美麗的頭飾，原來可以令到一塊來自深水埗的普通黑布變成華麗無比。

二汶表示跟造帽師Jaycow Milliner是情與義值千金，至於有此構思是因為看過樂壇殿堂天后徐小鳳最經典的演唱會海報，得悉只是用一塊紅布包紮全身，然後趴在酒店樓梯上拍照，引發她幻想及效法，二汶說：「肥妹仔比較難買衫，造衫只係用一次我又覺得好貴，有次聽到小鳳姐原來可以咁，我咪突然間諗，其實我又得唔得呢？結果同造形師商量之下， 發覺得喎，就成就咗呢張海報啦！哈哈，真係要多謝小鳳姐教路，又平又正，又唔失禮。」

由190磅減到136磅

二汶只用一塊黑布包身，笑言幸好未影海報之前，自己已經開始地獄式減肥中，由190磅減到136磅的她表示：「當時剛剛減咗肥兩個月，減咗三十磅左右，所以都唔使買好大塊布，就包得我住啦，哈哈，成塊布只係用夾夾住。所以大家都警告我咪動作太大，因為大動作就會爆開下滑，我裏面唔可以着衫，好容易走光。」

食減肥餐唔餓又好餓

因為努力之下Keep Fit，二汶直言影相時看回自己Fit爆背影，覺得好開心：「其實我減咗之後都係一個肥妹仔，不過我都好滿意喇，最緊要膝頭唔再痛。我影相嗰日，已經減咗三十磅，腰瘦咗五吋。當攝影師叫我轉多啲背脊畀佢影嗰陣，現場一遍驚叫，最初我仲以為發生咩事，係咪我Post衰，最終發覺原來係有啲相影出嚟，顯得我個背脊瘦到紙咁薄，嗰一刻我望住張相，都真係叫出嚟㗎！好耐冇見過『港姐膊頭』喺自己身上出現，呢個係我從來冇諗過咁快見到嘅。Keep Fit過程中最痛苦嘅係唔知大家明唔明白，做運動全身肌肉勁痛之苦以及食減肥餐出現一種叫『唔餓又好餓』嘅痛苦感覺，最初真係好折磨。」二汶又說到現在，已習慣經改變飲食，覺得健康是最緊要。

減肥前行路膝頭都會痛

是次Keep Fit除了想演唱會以一個更精神健康的全新姿態見觀眾外，二汶表示：「最重要原因係健康亮起紅燈，因高峰期重達嘅磅數，連行路膝頭都會隱隱作痛，所以都係時侯要面對健康問題。」又說以前常叫兄長林一峰贊助她做縮胸手術，現在「胸圍已經離晒罩」，覺得再努力減肥，要瘦過林一峰也非難事。

拍攝當日，二汶的父母、愛犬四四也有到場探班，期間覺得既然難得自己有「女皇Feel」，於是立即捉着四四一同合照留念，想不到抱小狗的照片，最後被投票選為演唱會海報。