玩到天光！港姐冠軍馮盈盈孤伶伶返屋企

今屆港姐同港男選舉就圓滿結束，一班港姐港男頭先就去咗九龍城打邊爐慶祝，玩到差唔多天光齊齊走人，港姐冠軍馮盈盈返咗大圍嘅屋企，不過今次有別於以往嘅情況，未見到馮盈盈嘅屋企人落樓接佢凱旋，淨係得無綫嘅工作人員陪住，馮盈盈就解釋因為太夜，屋企人都瞓晒覺先至冇人接佢。之前馮盈盈喺奪冠後受訪時話最想見到屋企人，仲話要食兩件西多慶祝，睇嚟呢兩個夢想都要等佢瞓醒先至可以實現。