【雪山影婚照】鄧健泓唇變紫石詠莉冇知覺

藝人石詠莉（Sukie）、鄧健泓（Patrick）拍拖近三年，三月時，Patrick於酒店舉行神秘驚喜派對，捧着99朵粉紅玫瑰及鑽戒向Sukie跪地求婚，Sukie感動得喊住應承。二人本來打算今年拉埋天窗，但因Sukie決定下月9號舉行她入行以來的首個個人演唱會，故將婚事延至明年，而Patrick就一直為其事業及婚禮作準備。其實於去年十一月，Patrick在加拿大為女友拍攝首張Hi-fi碟封套時，兩人已於當地拍攝婚紗照，過程既浪漫又難忘。

雪山取景凍到抽筋

於加拿大留學及長大的Patrick對加國有着微妙的感情和喜愛，故他向Sukie提議在那兒影結婚相，而Sukie亦贊成，約好當地攝影師後，他們便於度假勝地班夫（Banff）取景拍攝。

凍到全身冇知覺

拍攝當日，現場布滿積雪，天氣極之寒冷，Sukie穿着露肩的Lace袖婚紗，佩戴簡約頭飾及鑽石耳環，打煲呔、穿淺色西裝的Patrick則於雪蓋樹叢環境下拖着Sukie漫步；相當浪漫，不過浪漫背後其實二人凍到抽筋，禦寒三寶羽絨、頸巾、熱飲隨時standby。Sukie笑言這是她有生以來最痛苦的一次拍攝「工作」，她說：「我哋最初計劃去加拿大嘅時候，諗住當地天氣係十零度，冇諗過去到時天氣係零下，仲要落雪，但好感恩天公造美，畀我哋有個好靚嘅環境影相，但痛苦嘅係衫好單薄，有件婚紗係得一層lace，所以當時係由凍去到痛、痛去到痹、痹到跟住手腳同全身冇晒感覺，介乎好似冇咗手腳咁，好接近死亡嘅感覺。」Sukie又憶述和Patrick影相時，Patrick的嘴唇由本來紅卜卜，到慢慢變成愈來愈白到變成紫色，然後臉部又變青。

演唱會預演婚禮

雖然婚禮延遲舉行，但Sukie和Patrick異口同聲表示十月演唱會就是他們的婚禮預演。Patrick說：「我哋婚禮會擺去明年，如果大家喜歡嘅話，入場睇我哋嘅演唱會就等如睇我哋嘅婚禮，因為好想多啲朋友參與，人情係演唱會嘅飛，主菜係Sukie嘅歌，希望大家踴躍參與我哋嘅婚禮，但我唔會出場，只會喺台後。」Patrick更坦言希望與Sukie一齊變老，現時能力與空間許可之下的他都做了，現欠簽紙這一步。