車淑梅嘆梁盛子當年拋下子女有苦衷
20160919
東網電視
更多新聞短片
![](/hk/bkn/cnt/entertainment/20160919/photo/bkn-20160919142203654-0919_00862_001_01p.jpg?20160920103041)
車淑梅好希望姜麗文(右圖左)同姜文杰(右圖右)知道咗佢哋亡母嘅心聲後,會體諒亡母當年所做嘅決定。
DJ車淑梅今年七月到溫哥華旅行,更曾到過梁盛子家中品嘗對方親手炮製的私房菜美食,淑梅今日接受電話訪問時表示:「雖然我知佢係邊個,但今年七月先正式認識佢,真係相逢恨晚。佢喺煮食方面真係天才,所以我叫佢做靚太廚神,當日我仲同佢做咗個錄音訪問。」
唔鍾意講家事
車淑梅表示在訪問過程中,梁盛子給她感覺是一個好快樂、好爽朗的人,但當訪問中談到與秦沛所生的兩個仔女(姜文杰及姜麗文)時,她即感覺到梁盛子的痛,車淑梅說:「梁盛子喺訪問度話佢好唔應該離開屋企個門,呢個鬱結喺佢個心度,當時講到仔女佢情緒好波動,當時個錄音訪問仲要即刻暫停,我哋等咗都好耐...有成幾分鐘先再錄,我知佢平時唔鍾意講屋企人。」
道盡梁盈子當年難處
車淑梅又指梁盛子在小朋友年紀還很小時,已離開了屋企,對此車淑梅說:「當時佢話因為丈夫(指秦沛)環境比佢穩定,如果佢要湊住兩個小朋友,都冇乜好處,所以佢唔可以帶住兩個小朋友,佢好忍痛做出咁嘅決定,佢好希望仔女可以體諒佢呢個痛苦嘅決定,希望有日可以解開呢個鬱結。我都好希望佢對仔女聽到呢個訪問,明白佢哋媽咪心情,佢出發點、角度都係想仔女們有穩定生活,因為當時佢冇屋住,冇工作冇辦法,可惜佢呢個心願未了就走咗。」
梁盛子分享夫婦相處之道
車淑梅表示與梁盈子完成訪問後,她有以短訊聯絡梁盛子以表歉意,她說:「因為身邊人都叫我唔好問佢仔女嘅事,但我覺得佢可能有啲心結想講出嚟畀仔女知道,所以我同佢講對唔住我追問佢,亦好多謝佢咁真性情去同我分享,當時佢有覆我話:『我冇事,祝福我!』」車淑梅又指覺得梁盛子現時生活好幸福,有個十分愛錫她的律師老公,亦有個25歲大的兒子。
車淑梅又指當日飯聚時,梁盛子更與他們分享自身經歷,勉勵他們做夫妻要多拖手及錫錫,她說:「佢老公嗰日都喺度,佢先生好好,佢要等埋梁盛子坐低先食飯,總之佢好幸福。」