【相識九年】李亞男爆宋熙年喊足全程

無綫小生陳智燊（Jason）與前華姐宋熙年（Sarah）相戀七年終於拉埋天窗，王祖藍夫婦亦有飛去英國觀禮，李亞男更為Sarah擔任姊妹。

李亞男與Sarah共通點多

祖藍直言二人的婚禮簡單而溫馨，更搞笑為Jason爸爸傳話：「佢爸爸特別叫我哋傳話，因為佢話要多謝無綫，如果唔係兩個人喺無綫認識，一個來自澳洲、另一個來自美國嘅人就冇可能會相識。」祖藍更坦言與Sarah交情深厚：「最初Sarah嚟香港時，由佢媽媽保護佢嚟無綫。一開始佢由藝員經理帶嚟見我，因為我有教華姐廣東話同演技等。亞男亦同Sarah好friend，因為Sarah當年同亞男住同一個宿舍，Sarah父母嚟香港都會同亞男食飯。加上佢哋背景好似，所以亞男覺得特別感動，因為Sarah同佢一樣有個妹妹細自己十一年，佢哋都好似自己妹妹嘅半個媽咪咁。」

祖藍笑指婚禮進行時喜獲天公造美：「天氣好好，本來話應該落雨，但都冇事。」他稱新娘Sarah未行上紅地氈已經變喊包：「由陳爽囝囝做花仔，一對新人喺屋企人見證下舉行好簡單又溫馨婚禮，Sarah未行上紅地氈已經喊緊。」

祖藍又言早前為新人找來跳舞老師排練First Dance：「當晚我哋仲食飯，開埋After Party，大家跳舞玩得好開心。Jason同Sarah跳First Dance嗰陣練咗好耐。我哋幫佢搵排舞老師練習，佢哋好緊張但跳得好好，引到大家都一齊出嚟跳舞！」祖藍又透露Sarah妹妹與好友於婚禮內重現當時Sarah選華姐的才藝表演呼拉圈舞，而Jason兄弟則獻唱飲歌送給新郎。

李亞男受訪時亦坦言十分感動，因為自己見證二人由地下情發展至結婚，她說：「我見佢哋行禮時好感動。我識咗Sarah 9年，佢選完華姐之後我哋一齊住。我睇住佢同Jason由一開始地下情，到見證佢哋開花結果，真係好開心同溫馨！佢哋叫晒親戚朋友嚟，見到佢哋跳First Dance覺得好浪漫！」

爆Sarah一手包辦婚禮

亞男又大爆Sarah是感性的人，更在婚禮上全程做喊包：「佢去我婚禮都有喊，佢自己婚禮幾乎每一個環節都喊。而最特別就係Sarah妹妹致詞時，佢妹妹同我妹妹一樣，有個相差十一年嘅姐姐。佢嘅Speech好感動，話Sarah好似自己嘅第二個媽咪咁，佢哋感情好好！」亞男笑言眼見好姊妹一個個都搵到幸福，令她自覺好似媽咪一樣大感安慰。她又坦言為Sarah感驕傲：「因為冇咩人幫佢，佢一手包辦秘密婚禮，由訂裙、飾物、布置、請人到拍攝等全部自己籌備，好叻女！」