鄭國江與黃霑隔空過招：好作品會有知音

著名填詞人鄭國江、歌手區瑞強（Albert）與泰迪羅賓（Teddy Robin）亮相TVB娛樂新聞台節目《StarTalk》，大談昔日合作趣事和開騷感受。七十年代中後期至八十年代初，鄭國江與黃霑、盧國沾在詞壇鼎足而立，鄭國江說：「黃霑係我師父，好彩我冇畀佢鬧過，我哋三個好少見面，但好似武俠小說中嘅武林高手咁過招，好似黃霑有首《世界真細小》，我覺得佢填得太好，我之後遇到一首《小時候》，其中一句寫了『小小的宇宙』，要大過佢！」

不信人間盡耳聾

鄭國江又說：「之前汪明荃（Liza）的《熱咖啡》，初初推出時唔係太流行，點知Liza姐喺94年TVB台慶表演時再唱，令首歌翻Hit。我突然諗起黃霑有句說話『不信人間盡耳聾』，即係好作品有迴響，有信念好作品一定會有知音，就好似幾年前創作嘅《衝上雲霄》，初初好多年輕一輩都唔接受，我都講自己幾廿歲，點唔老套！但慢慢多人接受，又成為某學校嘅教學主題，我真係好感動！」

徐小鳳要求改詞

講到與不少歌星合作，鄭國江大爆徐小鳳曾致電要求改歌詞，他説：「當時我第一次幫徐小鳳寫詞，完全唔知點去處理，諗住用《何日君再來》嗰類情情塔塔去寫，點知小鳳叫我當佢係男歌手咁寫就得，最後我寫咗首中性嘅《風雨同路》，男女都唱得。」

爭拗中找到友誼

泰迪羅賓指甚少改鄭國江的歌詞，除了一首《點指兵兵》，他説：「我哋用咗兩個月時間先完成，其中有句歌詞我唱了『莫奈何』，本身鄭Sir係用『沒奈何』，我哋拗咗好耐，就係拗下拗下拗出友誼。」鄭國江補充說：「我係老一代，Teddy係新潮一代，喺語言上有好多衝突，結果皆大歡喜。」