孖王梓軒演舞蹈劇 河國榮做觀音大使

20160922
東網電視
更多新聞短片
河國榮(右圖右)今次就同王梓軒孖住一齊為舞蹈劇綵排。

藝人王梓軒(Jonathan)及河國榮日前在高山劇場為舞蹈劇《西遊記》綵排,好友喬寶寶、布偉傑(一哥)及同為舞林中人的雷晴雯(Winnie)秘密到場探班,令Jonathan及河國榮大為驚喜!

今次Jonathan與河國榮首次正式與舞蹈團合作,兩人均分演兩個角色,Jonathan演主持人及玉皇大帝,在美國讀大學時主修現代舞的Jonathan坦言久未上陣舞功生疏不少,連筋也硬了:「以前拉筋好易,但依家抬腿都只係得番一半,惟有喺演出之前盡操啦!」今次演出的主題曲及插曲皆改編自Jonathan自己的作品,望給觀眾新鮮感。

河國榮則同時飾演說書人及觀音大使,他笑言雖然過去亦曾習現代舞,但現已經忘得一乾二淨:「已經係好多年前嘅事,一早已經唔記得晒點跳,所以今次唔會跳,只係演同說,跳舞就留番畀Jonathan!佢真係跳得又勁又唱得,叻我好多!」他說今次仲有一大班小朋友一齊演出,熱鬧非常,戲服設計特別且色彩繽紛:「好難諗到《西遊記》竟然可以咁玩法,都真係幾特別,係戲服重咗少少。」

到場探班的Winnie笑言見到卡士後一直滿腦子問號,驚詫為何是由河國榮飾演觀音:「我開頭仲以為佢係反串添!」一哥則笑說:「觀音其實係男人,河國榮做啱架喇!下次可以搵埋喬寶寶做孫悟空啦!」