又想講粗口？馮盈盈驚爆「盧海鵬試咪」

應屆香港小姐冠軍馮盈盈（Crystal）、與香港先生冠軍黎振燁在九龍灣出席「TVB fun全城熱選投票頒獎儀式」，向得獎幸運觀眾頒贈名車。

會小心講嘢

馮盈盈被揭未當選港姐前在網上留言爆粗，令人嘩然，馮盈盈接受訪問時，應要求測試收音咪是否正常運操作，她笑說：「盧海鵬試咪！試咪！（你又想爆粗呀？）唔係呀。」當她得悉盧海鵬試咪！下一句的意思就是說粗口，她表示不知道當中意思，即驚訝說：「吓！冇㗎喇，淨係試咪！（係咪提起粗口都驚？）又唔會驚咗佢，反而會小心啲。」

自認夠貼地

馮盈盈日前與師姐麥明詩拍攝節目，問到麥明詩私下可有向她分享心得？她說：「有呀，佢畀咗好多鼓勵、支持我，同我分享佢當選後都受到好多負面批評，畀人鬧『離地』，佢教我要睇開啲，只要做好自己，觀眾見到你進步就會更加欣賞你。（你係咪想貼地啲？）唔係想唔想，我本身就係咁貼地，哈哈。（對負面報道睇得好開？）睇得開㗎，有時啲報道用另一角度去睇都幾好笑㗎，好似有報道話我中學喺學校有好多男同學Fans，但其實我係讀女校嘅。」