父親病逝　江欣燕淚崩：榮幸做到佢個女！

藝人江欣燕的爸爸江從光傳出離世消息，《東網》即時聯絡上江欣燕並確認消息，江欣燕接受電話訪問時，心情平靜的透露爸爸是三日前（21日）離世，並謂去年十月爸爸患上淋巴癌，過去一年都以化療作治療，她說：「很傷心但會接受！係無諗過呢個病會令佢咁急切離開，其實佢一直都做緊化療，抵抗力差啲，因為冷親入咗醫院，醫生就再CHECK到佢癌細胞擴散到肺部，血含氧低，係因為併發症離開。」她亦謂爸爸離世當日，她趕到醫院，媽媽在醫院樓下接她時，爸爸心臟就停止跳動。

目前停工一星期的她，與妹妹江希文籌辦爸爸的後事，喪禮定於10月8號，以基督教儀式進行，談到媽媽的心情，她說：「係最痛苦，很傷心但會接受，爸爸曾經同佢講過，想媽媽喺佢嘅喪禮上致辭，媽媽就即刻爆喊，爸爸咁做，都係想媽媽接受，其實爸爸最擔心嘅就係媽媽！」

在結束電話訪問之際，欣欣謂想向爸爸講一句說話：「我好榮幸做到佢個女！」然後失控爆喊！