【雪山驚魂】鄧健泓加國影婚照險出車禍

歌手石詠莉（Sukie）與男友鄧健泓（Patrick）一起製作第二張Hi-Fi碟，新碟於今日正式上市。兩人親力親為製作專輯，去年11月更前往加拿大的班夫（Banff）影婚紗相兼唱片封套，並發生不少難忘事。

瞓雪地影相凍傷

他們本以為當地陽光普照，但到埗後竟然漫天風雪，Patrick笑言：「原本封套嘅諗法並唔係冬日感覺，係諗住Sukie着短褲小背心，有啲牛仔Look喺Highway影，點知氣溫預計唔到，我哋就由夏天變成冬天嘅感覺。」雖然加拿大非常寒冷，但兼任攝影師的Patrick依舊專業，不但冇戴手套，更瞓雪地為女友影相，結果凍到雙手發黑及爆裂，令Sukie十分心痛。

此外，更發生了一段上山驚魂嚇親Sukie，她表示：「嗰日我哋諗住去某個地方影封套，要揸車上山先去到目的地，點知前一晚落雪，落雪同天氣凍搞到路面結咗冰，我哋架車又係前驅車，塞咗喺條斜路度，一鬆油架車就滑落去，但一踩油架車又唔去，仲爭啲撞到前面架車同後面架車。最驚險係對面線架車落山，好似冇Brake咁迎頭衝落嚟，同我哋架車係貼住過，好鬼驚，但好彩冇事！」