劉瑞祈@ReVe勁舞撕裂韌帶休息大半年

才出道逾兩個月的男子跳唱組合ReVe可謂出師不利，昨晚首次錄影無綫節目《勁歌金曲》，成員劉瑞祈（Kay）因跳舞時用力過度，右腳十字韌帶撕裂，他痛苦得倒地，現場工作人員急召救護車，由隊友陳子華（Cavan）陪伴送院治理，而錄影部分亦要喊停。

Kay留院一晚後已返家休息，他接受《東網》電話訪問時，聲線明顯感到他情緒低落：「依家要等膝頭位消腫後，會再去見醫生同照磁力共振，估計係十字韌帶同外側副韌帶撕裂，醫生話要做手術，要休息大半年。」

太用力扭傷菠蘿蓋

由於ReVe剛起步，一連串的宣傳正蓄勢待發，但手術後需長時間休養，令Kay大受打擊，如跌落谷底一樣，更不停自責說：「成件事好對唔住大家，尋日晏晝綵排好順利，出嚟效果好好，可能係咁，到正式錄影時嗰吓我太用力跳，就扭咗個『菠蘿蓋』，即時痛到瞓咗落地。」

問怕影響工作？Kay說：「我冇面見Cavan同成個團隊，因嚟緊要拍第二首歌MV，之前專登去台灣排舞，Cavan係無辜嘅，我叫佢一個都要做，但佢話我哋係一Team，點都要等埋我。」Kay表示唯一希望韌帶只是撕裂並非完全「斷開」，可能在有限能力下去完成手頭的工作，其他都不敢多想。