仲細過Cream！Bubbles平均得7歲戰歌壇

喺2003嗰陣只有10幾歲嘅盧嘉寶、陳曉彤同李蘊組成小女孩組合Cream，係當時最後生嘅女子組合，而且大受小朋友同家長歡迎。不過喺2006年其中一個成員陳曉彤退出組合，去愛爾蘭高級音樂學校進修，到咗2007年3個成員便宣布獨立發展，Cream就正式解散啦。

隨住Cream嘅解散，香港之後再未見類似嘅小女孩組合出現。近日男子組合FAITH嘅公司，搵咗3個平均年齡只得7歲嘅小女孩，組成新組合泡泡女孩（Bubbles），成員包括今年7月剛滿8歲嘅隊長Deseree（何佩琦）、 8歲主音 Bernice（何佩詩）及6歲領舞Yobie（謝芷睛）。

成員各有專長

Bubbles成員各有專長，Deseree外形圓碌碌夠可愛，佢讀緊國際學校，語言能力相當高，仲係3個成員之中最有領導能力嘅，所以被推薦做隊長！主音Bernice係Deseree嘅孖生家姐，性格比較文靜，但係唱歌嘅能力最得到導師讚賞。年紀最細嘅Yobie（謝芷睛）依家7歲都未夠，做得領舞佢嘅舞功底子當然係3個裏面最深厚，佢3歲已經接受舞蹈訓練，仲好似係體操隊嘅成員㖭，來頭認真唔惹少。

一連串唱歌、跳舞特訓

Bubbles喺年半前已經接受公司一連串嘅唱歌同跳舞特訓，最近網上流出佢哋嘅首支單曲《棉花糖的窩》MV，Bubbles喺MV裏面又唱又跳，相當落力，尤其肥妹仔Deseree ，佢本身圓碌碌嘅身形已經好可愛，加上佢想跳但又跳唔起嘅演出，為觀眾帶來無限歡笑，有人話似睇緊幼稚園嘅才藝表演。至於唱功方面，網民都讚佢哋啲假音好出色。

網民多劣評

個MV見街後，近日喺網上熱播，有心水清嘅網民發現支《棉花糖的窩》，四年前Faith嘅經理人Nancy都拍過MV，不過就冇乜人留意到，直至2年前首歌MV畀網民翻炒，不過評價多數係劣評。依家佢哋公司舊瓶新藥再拍《棉》，即被指其公司夠晒環保。

網民有話兒



Cexxxia Pxxg：成日推出一啲奇奇怪怪的組合 有實力既（嘅）都話丫 完全未準備好都又可以整個mv出黎（嚟） 聽下（吓）其他人意見啦

Dxxbie Lxx：首歌中間好似哈姆太郎。點解吾（唔）比（畀）d（啲） 小朋友唱d （啲） 岩（啱）年紀既（嘅）歌呢？太大人版變左（咗）反感......

Hxx：將經理人首歌俾（畀）咗佢哋，仲剷走原本經理人個MV，結果都係一樣咁「成功」。

Kxxn Hx Lxi：呢首歌係痛恨音樂嘅人先可以作得到...一聽都聽得出有啲字係唱唔準再接落去，呢三個細佬（細）妹真係慘。

Px kx：玩還玩，唔好玩小朋友，細細個咩都唔識比（畀）你擺上枱，大個睇番都唔知佢接唔接受到。