楊思琦唐紫睿蔡潔為新片搏盡　輪住受傷

藝人楊思琦、唐紫睿（Hazel）及蔡潔為新片《辣警霸王花》搏盡，壓力不但來自受傷、撞瘀、中暑，更來自眾女比堅尼示人鬥晒身材，已為人母的思琦呼籲觀眾要準時入場，不要白費眾女瞓身搏盡的心血。

思琦憶述為電影指公受傷經過，她說：「我同鄧麗欣有場喺泳池邊追逐同爆破嘅戲，導演錢國偉（Wilson）拍前再三提醒唔好NG，唔知係咪壓力大嘅緣故，冇為意隻手指公攝咗入支槍嘅『掹雞』位置，痛到冇晒知覺都死頂，要用冰敷。（動作戲難定晒身材戲難？）佢哋個個咁靚，身材咁好，你知啦，我生過BB，同場另一個媽咪就係Jessica C.，真係冇諗過我都做到霸王花，仲要比堅尼上身示人，但Wilson就話我得，奉勸觀眾要準時入場唔好遲，因為個個都好勁！」

Hazel險中暑

Hazel盛讚思琦，她說：「思琦身材好fit，係媽咪新典範，我都唔敢食飯，費事顯得我好肥妹，唔知係咪咁，加上我要全副軍裝戲服，熱到差啲中暑，NG咗8、9次，今次仲係我第一次拍中反應彈，又驚又痛，為咗套戲仲去練習開真槍，仲要提自己唔可以眨眼，好辛苦，今次真係壯烈犧牲！」

蔡潔受傷見紅

蔡潔亦一樣受罪，她說：「我第一次揸槍，唔係好熟練，但角色講我係隸屬最Top嗰隊霸王花，有場戲講我被其他霸王花反擊，拍完發現撞瘀咗隻手，流少少血。（邊個咁衰？）可能係啲手鏈唔覺意刮到，意外難免，戲中我成日挑剔其他霸王花，已經免除咗好多高難度動作戲啦！」